以下內容由爆料人提供，並非由本人撰寫。內容未經求證，只供參考，亦不代表本人以及本網立場：
D 人成日話內地IT 專才點勁點勁，我聽完真係得啖笑
我喺數字媒體入面做software engineer, 即係寫code 嗰d IT 狗。條team 間唔中要同深圳合作，夾下唔同系統之間係點溝通運作咁。由細到大聽得多，內地IT 專才好勁，香港競爭力落後呀咁；我做左一排發現真相原來震驚十三億人。
工作態度
其實出黎做野係「態度決定高度」，不過睇到深圳同事嘅工作態度，我就明點解大陸咁多豆腐渣工程，因為佢地做野真係得過且過。
文檔(documentation) 例牌唔睇，鍾意咁寫就點寫，出左事就一味賴落我地度。有時明明係佢地用錯，唔work 嗰陣就屈我地個野壞，俾埋sample code 都唔識跟，幾乎要捉住佢隻手仔教佢做。
記得有一次佢地有個問題解決唔到，煩左我地幾日，其實我地一睇就知咩問題，同佢講左又唔信。後來冇咁好氣，幫佢Google 埋搵埋link 有晒solution，都叫左勁多次先肯睇，差d 要我地第二日搭車上去做埋佢嗰份。
合作得多都知佢地有幾多斤兩，但係有次俾舊野佢地用，過左成個月都冇咩聲氣，心諗唔通佢地今次咁叻仔，識用得黎又完全冇問題? 心癢難耐之下問下佢地有冇野要幫手呀，問左幾次佢地都係話「有問題會找你們」。到左件product 臨出街前一個星期就x 街了，佢地喺non-office hour 同星期六日都不停用ON9 問題轟炸我地, 呢度又話唔work, 嗰度又話用唔到。
寫code 嘅野又點會完全冇bug, 不過佢地遇到bug 嘅時候通常都係一句「有問題，用不了」就冇左影，根本俾唔到有用資訊我地debug。一係就send 段片過黎就算，又唔講咩事，以為我地個個金睛火眼同佢玩找不同咩。
然後到佢地做嘅野有bug, 我地report 完佢地當冇件事，完全冇人處理嘅。而且深圳同事基本上每日只會覆兩次機，就係食lunch 之前同收工之前，有時想問清楚佢地個bug 係點，一來一回分分鐘已經過左幾日。
根本成個深圳team 都係廢，冇能力解決問題之餘又老奉叫我地做晒佢地d 野。
溝通
雖然祖國係強大，但programming 依然係以英文為主，「祖國你好」嘅中文編程重未成為主流。不過深圳team 人嘅英文能力就令人汗顏：variable 同function 名串錯字係好常見，有時你會見到拼音嘅命名tim, 不過呢種可能係「富中國特色的編程」。
既然深圳同事英文能力不足，我地作為血濃於水嘅同胞，又係一場同事，親上加親就梗係要遷就下佢地全程用中文。呼叫(Invoke)、函數(function)、請求(request) 呢d 術語我地都背到耳熟能詳，不過好可惜佢地講嘅野經常都會令我地每個字都明，夾埋一齊就唔明，有時真係要成班同事圍埋一齊解碼咁。
我都明白「要不是中央政府照顧你們香港，完蛋了」，有時咪就下佢地囉，只不過有時佢地講野真係勁冇禮貌，唔知以為佢地係CTO tim 呀。
同埋有樣野只要大家同大陸人合作過，都會發現佢地明明開左個group 出黎都唔用，係都要玩私訊。不過據我嘅推測，原因不外乎係因為佢地柒得太多次，唔想喺成班人面前衝出黎柒姐，大陸人都有羞恥心嫁嘛。
祝大家好運
唔知係budget 唔夠定係文化差異，總之同我合作過嘅大陸人全部都係咁嘅質素，所以大家咪再妄自菲薄，其實正常香港人做野點都好過大陸人。如果你老細貪平鍾意外判俾大陸人做，祝你公司好運啦~
Comments